NA STRADA DI LEMBRANSA - Poema de Totoi de Gunay

NA STRADA DI LEMBRANSA

Boca di noti mi sintadu ta pensa n'odja nha dizeju
Ta baxa fijon d'agu curasa'n da'n un pancada
Na nha petu necê un rotcha de sodadi
Na nhas odjus un mar di agu

Ta core na strada di lembransa
Lembra na fijon d'agu necê un dor na nha petu
Qui trazen magua qui'n tchora maguadu
Fijon d'agu sodadi qui'n ten di bô na nha petu

Ca ta more el sta bibu ta vive li na nha petu
Sima un mininu ta rasta dia ta bai dia ta ben
Sodadi di bô fijon d'agu ta papia cu mi
Dentu mi ta necê un melodia di sodadi

Ô mar mar d'orizonti faze bus ondas tchora
Na baia di fijon d'agu na marê di tardi
Pa tudu mundu ubi nha dor di sodadi
Nha sufrimentu lembra na bô fijon d'agu

Djan ten sodadi di tempu passadu
Ta duê'n lembra qu'ês doce momentu
Qui lâ cu gostu n'vive na mar di tardi
Fijon d'agu abô ênha bersu d'amor di sodadi

Pundê qui'n bai p'ês mundu fora
Abô ê nha bandera di sodadi ô fijon d'agu 
Pan sana pan tchora pan canta cu sodadi
Dixa'n tchora sodadi di bô sodadi d'alguên

Totoi di Gunai